Tjesaliw anga tua hulic a pakaamin tua ljinautjian a kai
—kiqaung tua sihu tu pasusu tua karasudjan nua pinuikacaunan tua patjara
kinri a caucau.
Ka kaljaqemcengan a ziday aicu a “ sinankakudan tua kai a ljinautjian” namasan papenetjan anga tua siqulipan katua sitailjan tua marka kai katua kakudan nua marka zuku i taivan, saka nakiquljis anga tazua liningdjelj nua linguguku a “ sinipaljayang a pinnetjan tua kinri nua pinuikauanan a cuacau” a paljakev tua saregeman nua caucau, tazua “sinankakudan a pitua sikicapiljan tua sizi nua naljemtu anga a caucau” katazua “ sinankakudan tua kinri a sitjara kizay siakay bungka nua inuikacauanan ” a kemakezeng tua namapapamamaw a kinri, tua sitjara bungka a kirin, tua kinri a sitjara kitulu katua sikicapiljan tua sizi.
Ka mavan anga a taqaljaqaljan a makilaing, azua pinnetjan a “ sinankakudan tua kai a ljinautjian” katazua “ sinankakudan a pakaizua tazua rurakeraketj a papezangal tua kai a ljinautjian” ka mavan anan azua ti ciangcise kati ciangcingku a maraljak a napaljavak, qinulip anga ka sika 2003 katua 2014 a caviljan.saka nalemingdjelj anga uta a lipui-ing tua “masamusalj a hulic a karasudjan” a namsan tineveteveljan a patjara kinri nua caucau a pinuikacauanan. Ka 2019 a cavilj napasekeljang a cungtung tu pasusu tazua “ hulic a sipapirazekan tua marka kinakaikaiyan nua kuni”. A pasekeljlang tu vaivaik anga a i taiwan semanpazangal tua namakakaizuazua, a kemakezeng tu namapapamamaw a marka kai. Ljakua, a sivaikan nua sihu a pitua sitjara sivitay, sitjara papapenetj, sitjara semanhuic, sikituluan, tua sikasekingan a pipenuljatan, kamayan anan a naqemapulu tua ljinautjian sa santailjan a zuma nu kaiyan, qau aicu a namayatucu inika amin tua neka nu pinatjaljeman a hulic, namasan nakiquljis a mavan tua marka hulic a penuljat a kinarasudj nua lipui-ing. Saka natjesaliw aravac tua sinan tjaljavavavan a kananguaqan nua pinuikacauanan tua namakakaizuazua, tua namapapamamaw.
A paqulid aicu a i taivan inika natemavak tua ljinautjian. A sasupuan nua ruqataqatam itua 2020a caviljl, pacalivat tua 80 a pasintu a qivuivu tua masanmusalj a kai, aicu sikakeljangan tu masanlialiaw a kai i taivan a paqulaid. Ljakua kemasi cuay a patje tucu, a pitua namapenetj a sikituluan qadiqadiljenn sakamaya a situ tu semaljinautjjian a kitulu, neka nu sivalan a pakatua kaimazan a kai a kitulu tua tamaq, tua siakay, tua sitjara qinati a caquan. A sikasekingan katua sisanvecikan nua kukka tjemaula tua zuma nu kaiyan. Qau saka a kazelju nua tjatjuruvu a taqaljaqaljan, manu mavan anga a sikaizuan nua nasemuram a kakudan a papeneka tua kinakaikaiyan a kimadju, sa maparucunuq anga a kakudan, inika makaya anga .mareqaivu a marevuvu. Pai aicu a namayatucu natjesaliw aravac tua namasan kakudan itua minsiukuka a papamamaw a kemuletj tua paisu a sikitulu, tua sika makayan a namapalaing a sikamerazekan nua kakudan a namasan nasi tua kinacaucauan.
Palegeleg amen:
(1) namasan kakudan nua sihu a pasusu tua hulic a remasudj, sa patjezua tua neka nu pinatjaljeman a hulic a semavuta a pakitulu tua ljinautjian. Sa penetji a ljinautjian a kai a seman makaya piliqen a kitulu, tua sika izuan nua kinri nua taqaljaqaljan a peniliq a pakatua kinakaikaiyan a gemaugaw tua namapenetj a sikituluan. Saka kemalja mapasusuan nazua “kinarasudj tu qemulip tua napasasumayamaya a sikituluan” a kemakezeng tua sikituluan a kinri;
(2) paljakev tua kinri nua taqaljaqaljan tu makaya lemaing tua kinakaikaiyan nimadju a kicapilj tua sengsengan nua taqaljaqaljan, saka izua mamaw a kinri a pitua siljiavavavan a kiitulu, tua seeking nua kukka, tua sitjara hulic a sengsengan katua masan kumuing kata sivitay. Sa mapasusu a pinnetjan a kinri nua caucau itua “masanmusalj a karasudjan” a mavan a kinri a kicapilj tua size katua kinri a pitua kakudan.
A vilivililjan, aicu a kemamayan tua masanlialiaw a kinakaikaiyan namasan sivaikan tucu nua pinuikacauanan. Qau a kaimazan i Taiwan a drusa puluq katu izua a marka kai uri pasa maquliqulip anga. saka a semanpazangal a paka amin tua masanitalj a kai, inika amin a papedjaljaw tua sikaqulipan nua bungka, sikameracuk aravac nua rininkutjan a pitua ljemkuya katua qemaluvu tua (FIMI) a kemasi tua zuma nu kunian. Saka pai aicu a papamamw tua marka kai inika sinipangalj a manguaqan, namasan qapulu a kinri a mavan. Manasika, izua sikining nua sihu a kipalikuz a ljemenguaq tua pinakaizua nua sitjaisangasan a sihu a napasasumayamaya a kakudan, sa pacikel a papirazek tua namasapazangal a kinitjuayan nua i tavan a marka kinakaikaiyan.
[排灣語聲明，特別感謝PCT 原住民宣教委員會提供]
